کیلکود - کھیل اور کھلاڑی اردو بلاگ

فیفا وڑلڈکپ جنوبی افریقہ 2010 - گروپ بی

2010-06-10T02:34:00.003+08:00

فیفا وڑلڈکپ جنوبی افریقہ 2010 کے گروپ بی کی ٹیمیں

ارجنٹیا

نائیجیریا

جوبی کوریا

یونان

ارجنٹیا کا دنیائے فٹبال کی صف اول ٹیموں میں شمار کیا جاتا ہے۔ یہ ارجنٹیا کی فیفا وڑلڈکپ میں پندرہویں شرکت ہوگی اورہمیشہ کی طرح اس بار بھی ٹیم ارجنٹیا فیفا عالمی کپ جنوبی افریقہ 2010 کی ایک مضبوط امیدوارکے طور پر میدان میں اترے گی۔ اس سے پہلےارجنٹیا نے 1978 اور 1986 میں فیفاعالمی کپ کا اعزاز دوبار جیتا ہے اوردو ہی بار 1930 اور 1990 میں فیفا وڑلڈکپ فائنل کھیلے ہیں۔

1986 کی فاتح ٹیم کے کپتان اورارجنٹیا کےعظیم ثپوت ڈئیگومیراڈونا اس بارٹیم کے ساتھ بحیثیت منیجرموجود ہوں گے۔ حالانکہ انتخابی مقابلوں میں ڈئیگومیراڈونا بحیثیت ٹیم منیجر کےمتاثرکرنے میں ناکام ہوگئے، لیکن ڈئیگومیراڈونا کا کہنا ہے کہ میرے پاس فٹبال ٹیم منیجنگ کا تجربہ تو نہیں ہے لیکن میں نے دو فیفا عالمی کپ کے فائنل کھیلے ہیں اور مجھے معلوم ہے دنیائے فٹبال کا سب سے بڑا اعزاز جیتنے کے لیے کس چیز کی ضرورت ہے۔

ارجنٹیا کے پاس اپنے بل بوتے پرمیچ جتانے والے کھلاڑیوں کی کمی نہیں ہے جیسے لیونل میسی (Lionel Messi)، کارلوس تیویز(Carlos Tevez)، گونزالو ہیگوان وغیرہ لیکن ان باصلاحیت کھلاڑیوں کو میچ جیتنے کے لیےایک بہترین حکمت عملی چاہیے جو ڈئیگومیراڈونا کی زمہ داری ہے، اگر انہوں نے اپنے ذمہ داری اچھی طرح نبائی تو ارجنٹیا کو تیسری دفعہ عالمی کپ چومنے سے روکنا ناممکن ہوگا۔۔۔۔۔ لیکن یہ بہت بڑا اگر ہے۔۔۔۔!!

اہم کھلاڑی

دنیائے فٹبال کے بہترین کھلاڑی لیونل میسی (Lionel Messi) بارسلونا (Barcelona)

کارلوس تیویز(Carlos Tevez) مانچسٹر سٹی (Manchester City)

کپتان جاویئر ماسشیرانو (Javier Mascherano) لیورپول (Liverpool)

جان سیباسٹیئن ویرون (Juan Sebastian Veron)

گونزالو ہیگوائن (Gonzalo Higuain) رئیل مڈریڈ (Real Madrid)

ارجنٹیا نےانتہائی مشکل سےفیفا وڑلڈکپ جنوبی افریقہ کے لیےانتخابی مقابلوں میں کامیابی حاصل کی ہےجس میں قسمت نے بھی ان کا ساتھ دیا، اگر اسی طرح قسمت نے ساتھ دیا اورڈئیگومیراڈونا بہترین حمکت عملی نہ صرف بنانے بالکہ کھلاڑیوں کو سمجھانے میں بھی کامیاب ہوگئے تو ارجنٹیا تیسری دفعہ عالمی کپ جیت سکتا ہے۔

نائیجیریا (المعروف سپرایگلز)

اپنے اولین فیفا وڑلڈکپ 1994 میں نائیجیریا نے شاندار کھیل پیش کرکے دنیا کو حیران کرکےافریقی براعظم سے فیفا وڑلڈکپ پرکیمرون کی اجاداری کوختم کردیا۔ پھراگلے عالمی کپ 1998 میں بھی اپنے شاندار کھیل کا سلسلہ جاری رکھا، جس کے بعد تجزیہ نگارپیشن گوئیاں کرنے لگے کہ اگرافریقی براعظم سے کوئی ٹیم سیمی فائنل میں پونہچی تو وہ نائیجیریا ہوگی۔

لیکن حیرت انگیز طور پر 2002 کے بعد نائیجیریا اپنے جفاکشی کھیل کا وہ معیار قائم نہ رکھ سکی جو اس کی پیچان تھی اور پھر افریقہ سے گھانا، سینیگال اورآویروکوسٹ جیسی ٹیموں کا ابھرنا تھا کہ نائیجیریا 2006 وڑلڈکپ کے لیے حق انتخاب بھی نہ جیت سکی۔ فیفا وڑلڈکپ جنوبی افریقہ کے انتخابی مقابلوں میں بھی نائیجرین کی اچھی کارکردگی سے زیادہ مخالف ٹیموں کی خراب کارکردگی نے نائیجیریا کوفیفا عالمی کپ جنوبی افریقہ میں کھیلنے کا چوتھی بار موقع دیا۔

گزشتہ فیفا عالمی کپ

اب تک نائیجریا نے تین عالمی کپ مقابلوں میں شرکت کا اعزاز حاصل کیا ہے۔ 1994 عالمی کپ نائیجیریا کی اولین شرکت تھی۔ 1998 اور 2002 کے فیفا عالمی کپ مقابلوں میں شرکت کرنے کے بعد فیفا عالمی کپ جرمنی 2006 کے انتخابی مقابلوں میں ناکامی کا سامنا ہوا۔

اہم کھلاڑی

اوبفیمی مارٹینس (Obafemi Martins)

جان اوٹاکا (John Utaka)

جوزف یوبو (Joseph Yobo)

آئیجبینی یاکوبا (Aiyegbeni Yakuba)

فیفا وڑلڈکپ جنوبی افریقہ میں نائیجیریا سے کوئی خاص کارکردگی کی امید نہیں ہے لیکن پھر بھی دوسرے مرحلے میں آسانی سے پونہچ جائے گی جو اس نوجوان ٹیم کے لیے باعث اطمینان نتیجہ ہوگا۔

جنوبی کوریا

فیفا عالمی کپ میں براعظم ایشیا سے اولین فٹبال ٹیم کا اعزاز پانے والی جنوبی کوریا فیفا وڑلڈکپ 1954 میں پہلی شرکت کرکے تاریخ رقم کرلی۔ دوسری بار شرکت کے لیے جنوبی کوریا کو 32 سال کا انتظار کرنا پڑا تو پہلی جیت جنوبی کوریا اپنے سرزمین پر منعقد فیفا وڑلڈکپ 2002 میں ہی حاصل کرپائی۔ یہ جیت اس وجہ سے بھی اہم ہے کہ اسی عالمی کپ میں آگے جاکر جنوبی کوریا نے پرتگال، اطالیہ اور سپین کو شکست دے کرپہلی ایشائی ٹیم کا فیفا عالمی کپ کے سیمی فائنل میں کھیلنے کا اعزاز بھی حاصل کرلیا۔

اہم کھلاڑی

پارک جی سونگ (Park Ji-Sung)

پارک چو یونگ (Park Chu-Young)

جنوبی کوریا فیفا وڑلڈکپ جنوبی افریقہ 2010 میں اگر دوسرے مرحلے میں پونہچ گئی تو یہ ایک بہت بڑی کامیابی تصور کی جائے گی۔

یونان

یونان تہذیب کی بنیاد کھیل ہے اور موجودہ کھیلوں کی چمک دمک کا مرکزی خیال یونانی تہذیب سے ہی لیاگیا ہے۔ لیکن موجودہ یونان کسی بھی لحاظ سے دنیائے کھیل کا بڑا نام نہیں ہے اور فیفا فٹبال عالمی کپ مقابلوں میں بھی فیفاعالمی کپ جنوبی افریقہ یونان کی 1994 کے بعد دوسری شرکت ہے۔ یہاں قابل ذکر بات یہ ہے کہ یونان نے ٹیم منیجر اوٹوریگال کی راہنمائی میں انتہائی منفی کھیل کے ذریعے یورپیئن چمپئین 2004 جیت کر دنیا کو حیران کردیا تھا لیکن اس کے بعد یونان نے کا منفی کھیل کا جادو اور نہ چل سکا۔

فیفا عالمی کپ جنوبی افریقہ کے انتخابی مقابلوں میں جیت یور2004 کے بعد ایک دفعہ پھر یونان فٹبال کےلیے ایک بہت بڑی کامیابی ہے۔ اس فیفا عالمی کپ میں شرکت کرنا ہی یونان کے لیے باعث اطمینان ہے۔

فیفا وڑلڈکپ جنوبی افریقہ 2010 - گروپ اے

2010-06-08T00:19:00.001+08:00

(صرف پانچ دن باقی ہیں فیفا عالمی کپ جنوبی افریقہ 2010 کے افتتاحی میچ کے شروع ہونے میں۔ آج سے میں اس بلاگ پرفیفاوڑلڈکپ 2010 کے آٹھ گروپس کا مختصر تعارفی سلسلہ شروع کررہاہوں۔ آپ بھی اس سلسلے میں حصہ لیجیے اوراپنے خیالات و تاثرات تبصروں کے ذریعے مجھ تک پہنچاتے رہیں۔ شکریہ)

فیفا وڑلڈکپ 2010 کے گروپ A میں ٹیمیں

جنوبی افریقہ

میکسیکو

یوروگوائے

فرانس

جنوبی افریقہ

میزبان جنوبی افریقہ کی فیفا وڑلڈکپ میں یہ تیسری شرکت ہے جس کا حق انتخابی مقابلوں کے بغیر بحیثیت میزبان ٹیم کے حاصل کیا ہے۔ جنوبی افریقہ فٹبال ٹیم اوسط درجے کی نسبتا کمزورٹیم ہے جس سے کوئی خاص کارکردگی کی امید نہیں ہے۔ عام طور پر فٹبال شائقین میزبان ٹیم کا پہلے مرحلے میں ہی مقابلوں سے باہر ہوجانا پسند نہیں کرتے کیونکہ اس سے میزبان ملک کے مقامی شائقین میں مقابلوں کے لیےبددلی پیدا ہوجاتی ہے۔ لیکن جنوبی افریقہ کے معاملہ میں ایسا نہیں ہوگا کیونکہ خود جنوبی افریقہ کے شائقین کوبھی اپنی ٹیم سے زیادہ توقعات نہیں ہیں، اور اپنی ٹیم کا اگلے مرحلے میں پہنچنے سے زیادہ ان کے لیے یہی بہت بڑا واقعہ ہے کہ فیفا عالمی کپ ان کے ملک میں منعقد ہورہا ہے۔ اگر ان کی ٹیم اگلے مرحلےمیں پونہچ گئی تو سونے پہ سہاگہ، نہ پونہچی تو آنسو بہانے کے بجائے عالمی کپ سے لطف اندوز ہونے کو ترجیح دیں گے۔

اس انگور کھٹے ہیں جیسے رویے کی وجہ یہ بھی ہے کہ جنوبی افریقہ کا افتتاحی مقابلہ شمالی امریکہ کی مضبوط ٹیم میکسیکو کے ساتھ ہوگا، دوسرا میچ اگرچہ اوسط درجے کی ٹیم یوروگوائے سے ہوگا لیکن یہ بات ان کے اعصاب پر تاری رہے گی کہ یوروگوائے دو دفعہ سابق عالمی چمپیئن ہے۔ اور آخری سب سے مشکل ترین امتحان 1998 فیفا وڑلڈکپ کی فاتح فرانس کےساتھ ابتدائی مرحلے کے آخری مقابلے کی صورت میں ہوگا۔

لیکن یہاں قابل ذکر بات یہ ہےکہ فرانس 1998 والی ٹیم نہیں ہے، انتخابی مقابلوں میں مشکل سے کہیں گرتے پڑتے اور کہیں “فرینچ خدائی ہاتھ“ کا استعمال کرکےجیسے تیسے ان فیفا وڑلڈکپ فائنل مقابلوں میں پونہچی ہے تو دوسری طرف یوروگوائے بھی مشکل سے اوربراعظمی انتخابی مقابلے کےذریعے فیفاعالمی کپ کے فیصلہ کن مقابلوں میں کھیلنے کا حق حاصل کیا ہے۔ میرے خیال میں جنوبی افریقہ کم از کم یوروگوائے کا مقابلہ کرسکتی ہے۔

ایسے میں اگر جنوبی افریقہ یوروگوائے کو ہرا دے اور میکسیکو یا فرانس سے کم ازکم ہار سے بچ جائے تو بلاشبہ جنوبی افریقہ دوسرے مرحلے میں پونہچ کر فیفاوڑلڈکپ کی راوایت قائم رکھ سکتی ہے۔ واضح ہوکہ گزشتہ تمام فیفا وڑلڈکپ کے میزبان ٹیم نے کم از کم دوسرے مرحلے تک رسائی ضرورحاصل کی ہے۔ اس میں فیفا عالمی کپ 2002 کی جنوبی کوریا بھی شامل ہے جو کم وبیش جنوبی افریقہ معیار کی ہی ٹیم تھی، لیکن انتہائی تجربہ کار کوچ گوئزہڈڈنک کی راہنمائی میں کواٹرفائنل تک پہنچ کر تاریخ رقم کی۔

جنوبی افریقہ نے بھی حال ہی میں تجربہ کاربرازیلین کوچ کارلوس البرٹو پیریرا (Carlos Alberto Parreira
)کی خدمات حاصل کی ہیں جس نے اس سے پہلے کویت، سعودی عرب، متحدہ عرب امارات، اور دو دفعہ برازیل کوبھی کوچ کیا ہے جس میں فیفا وڑلڈکپ 1994 کی فتح بھی شامل ہے۔

گزشتہ فیفا عالمی کپ شرکت

اب تک جنوبی افریقہ نے اپنے گزشتہ دو فیفا عالمی کپ فرانس 98 اور جاپان کوریا 2002 میں صرف ایک کامیابی حاصل کی ہے۔

اہم کھلاڑی

کپتان آرون موکوئینا (Aaron Mokoena) انگلش فٹبال کلب پورتسماؤتھ (Portsmouth FC)
سٹیوین پرئینآر (Steven Pienaar) انگلش فٹبال کلب ایویرٹن (Everton FC)

میرے خیال میں جنوبی افریقہ کے پاس دوسرے مرحلے تک رسائی کے 50-50 موقع ہے۔

میکسیکو

فیفا وڑلدکپ میں میکسیکو کی یہ تیرہویں اور 1990 سے مسلسل پانچویں شرکت ہے۔ گزشتہ پانچ میں سے چار فیفا وڑلڈکپ میں میکسیکو دوسرے مرحلےتک راسائی پانے کے بعد انتہائی مایوس کن انداز میں مقابلوں سے باہر ہوجاتی ہے۔ میکسیکونے ہمیشہ انفرادی طور پر انتہائی باصلاحیت کھلاڑی پیدا کیئے ہیں جن کی فٹبال ہنرمندی دیکھ کرآدمی حیران رہ جاتا ہے کہ اس ٹیم کو اب تک دنیائے فٹبال میں وہ درجہ کیوں نہیں ملا جس کی یہ حقدار ہیں، فیفا عالمی کپ انڈر 17 2005 میکسیکو نے جیتا تھا جس کے پانچ کھلاڑی اب اپنے قومی ٹیم کے لیے کھیل رہے ہیں۔ لیکن جب آب انہی باصلاحیت کھلاڑیوں کو میکسیکو ٹیم میں کھیلتے ہوئے دیکھیں گے تو یہ اپنی انفرادی صلاحیت کے درجے کی پرچھائی نطر آئیں گےاس وقت آپ کو بےاختیارپاکستان کرکٹ ٹیم کی یاد آجائے گی۔

فیفا عالمی کپ 2010 کے انتخابی مقابلوں کے ابتدائی مراحل میں میکسیکو انتہائی مشکل صورت حال سے دوچار تھی اور ایک مرحلے پر تو فیفا عالمی کپ فائنلز میں کھیلنا ناممکن نظر آرہا تھا جس کی پااداش میں ارباب اختیارنے منیجر سیون گوران ارکسن (Sven Goran Eriksson) کو نکال باہر پینکھا اور ان کی جگہ جاویراگوئیرے (Javier Aguirre) کو ٹیم منیجر کی زمہ داری سونپی۔ نئے منیجرنےاوٹیموک بلانکو (Cuauhtemoc Blanco) کو خانہ نشینی سے واپس بلایا جو واقعی میں ایک بہترین فیصلہ ثابت ہوا۔ بلانکوکے ٹیم میں آنے سے نوجوان اور باصلاحیت کھلاڑیوں گوئیلرمو اوشوعا (Guillermo Ochoa)، ایفرئین جواریز (Efrain Juarez)، انڈریس گوارڈاڈو (Andres Guardado)، اور جیئوانی دوس سنٹوس (Giovani dos Santos) کوٹیم میں انمول تجربے کے ساتھ اعتماد ملا جس سے ٹیم میں ایک نئی ولولہ انگیزی پیدا ہوئی اور مسلسل پانچ فتوحات حاصل کرکے فیفا عالمی کپ جنوبی افریقہ میں کھیلنے کا حق آسانی سے حاصل کرکے ناممکن کو ممکن کردکھایا۔

گزشتہ فیفا عالمی کپ شرکت

اب تک میکسیکو نے اپنے گزشتہ 13 فیفا عالمی کپ مقابلوں میں 1970 اور 1986 میں کواٹرفائنل تک رسائی حاصل کرکے بہترین کارکردگی کا مظاہرہ کیا ہے۔

اہم کھلاڑی

جیووانی ڈوس سنٹوس (Giovani dos Santos) گالاتاسرے فٹبال کلب ترکی (Galatasaray)

کارلوس ویلا (Carlos Vela) آرسینل فٹبال کلب انگلینڈ (Arsenal)

حالیہ کارکردگی کی بنیاد پرحسب روایت میکسیکو زیادہ سے زیادہ کواٹرفائنل تک ہی رسائی پالےگی، اس سے زیادہ نہیں۔ حالانکہ اس ٹیم کو کم ازکم سیمی فائنل تک پوہنچنا چاہیے۔

فرانس

فرینچ کو ہمیشہ ایک اچھی فٹبال ٹیم سے جانا جاتا تھا، لیکن گزشتہ بارہ فیفا عالمی کپ مقابلوں میں فرانس نے 1958 اور 1986 میں تیسرا مقام ہی حاصل کرپائی جس کی وجہ سے فرانس دنیائے فٹبال کے عالمی طاقتوں برازیل، ارجنٹینا، اطالیہ اور جرمنی کے سامنے ایک اوسط درجے کی ٹیم بن کر رہ گئی تھی۔ یہ نوے کی دہائی تھی جب فرانس نےفٹبال کھیل کو رہتی دنیا تک چمکنے دھمکنےوالےستارے دیئے جنہوں نےفٹبال شائقین کو فرانس ٹیم کا گرویدہ بنالیا۔ زین العابدین زیدان المعروف زینا دین زیدان، لیلیان تھورم، کلاؤڈے ماکالیلے، لورینٹ بلانک، ڈئیڈرڈیسچمپ، فابیئین بارتھیز وغیرہ جیسے انتہائی باصلاحیت کھلاڑیوں نے 1998 میں اپنی سرزمین پر فرانس کو دنیائے فٹبال کا سب سے بڑا عالمی اعزازپہلی دفعہ دلایا۔

حالانکہ 2002 اور 2006 فیفا عالمی کپ میں فرانس بحیثیت ٹیم 1998 والا معیار قائم نہ رکھ سکی، اور 2010 فیفا وڑلڈ کپ کے انتخابی مقابلوں میں بھی مایوس کن سلسلہ جاری رہا اور انتخابی مقابلوں میں اپنے گروپ میں دوسرا مقام ہی حاصل کرپائی جس وجہ سے فرانس کو دوبارہ دو میچوں کے انتخابی مقابلوں میں آئرلینڈ کے ساتھ کھیلنا پڑا جو فرانس نے بمشکل جیتا اور جس کا آخری میچ تھیری ہینری کے “خدائی ہاتھ“ گول کی وجہ سے انتہائی متنازعہ ثابت ہوا۔

لیکن اس کے باوجود انفرادی طور پر اب بھی فرانس کے پاس انتہائی باصلاحیت اور اپنے بل بھوتے پر میچ جتانے والے کھلاڑی موجود ہیں، جن میں بارسلونا فٹبال کلب کے لیے کھیلنے والے کپتان تھیری ہینری (Theiry Henry)، بائرن مونیک جرمن فٹبال کلب بائرن مونیک کے فرانک ریبیری (Frank Ribery) جو اس وقت دنیائے فٹبال کے انتہائی باصلاحیت اور ہنرمند کھلاڑیوں میں سے ایک ہیں، اس کے علاوہ چیلسی فٹبال کلب کے فلورینٹ مالوڈا (Florent Malouda)، آرسینل فٹبال کلب کے ابو دیابی (Abu Diaby) بھی اپنے جادوئی کھیل سےلمحوں میں میچ کا پانسہ پلٹ سکتے ہیں۔

اہم کھلاڑی

تھیری ہینری (Theiry Henry) بارسلونا فٹبال کلب (Barcelona)

فرانک ریبیری (Frank Ribery) بائرن مونیک فٹبال کلب (Byern Munich)

فلورینٹ مالوڈا (Florent Malouda) چیلسیا فٹبال کلب (Chelsea)

ابو دیابی (Abu Diaby) آرسینل فٹبال کلب (Arsenal)

نکولس انیلکا (Nicolas Anelka) چیلسیا فٹبال کلب (Chelsea)

یوحان گورکف (Yoann Gourcuff) بورڈیئوکس فٹبال کلب (Bordeaux)

جیریمی تاؤلالن (Jeremy Toulalan) لیون فٹبال کلب (Lyon)

غرضیکہ انفرادی لحاظ سےکاغذ پر فرانس کی پوری ٹیم ہی اہم، انتہائی باصلاحیت، فٹبال ہنرمندی میں باکمال کھلاڑیوں پر مشتمل ہیں۔ لیکن میچ کاغذ پر نہیں کھیلے جاتے۔ اور اگرکسی بھی ٹیم کے پاس بہترین حکمت عملی نہ ہو تو وہ ٹیم نہیں، بالکہ گیارہ افراد کا ایک بدانتظام وبد نظم گروہ بن جاتا ہے جس کے ہر فرد کوٹیم کی بجائے اپنی پڑی ہوتی ہے۔ فرانس کے ساتھ بھی پچھلے چھ سالوں میں یہی کچھ ہورہا ہے جس کا ذمہ دار ٹیم منیجر ہے جو میرے خیال میں دنیائے فٹبال کا انتہائی نالائق منیجروں میں سے ایک ہے۔

دنیائے فٹبال کے چند باصلاحیت کھلاڑیوں پر مشتمل فرانس ٹیم کو آپ مکمل طور پر نظرانداز نہیں کرسکتے۔ اسی لیے فرانس فیفا وڑلڈکپ جنوبی افریقہ 2010 کی امیدواروں میں سے ایک ٹیم ہے۔ لیکن اس کے باوجود میرا خیال ہے فرانس سیمی فائنل سے آگے نہیں جاسکتی۔

یوروگوائے

ایک زمانہ تھا یوروگوائے دنیائے فٹبال کی بہترین ٹیموں میں سے ایک تھی جس نے دو دفعہ عالمی کپ کا اعزاز حاصل کیا۔ لیکن 1970 کے بعد یوروگوائے فٹبال کا زوال شروع ہوا اورساتھ ہی جنوبی امریکہ سے چیلی، پاراگوائے، کولمبیا، وغیرہ جیسی نئی ٹیموں کے ابھرنے سے آہستہ آہستہ زمانے کے گردشوں نے یوروگوائے فٹبال کو گمنامی کے اندھیروں میں پینکھ دیا اوردو دفعہ عالمی چمپیئن کو عالمی کپ میں شرکت کے لالے پڑگئے۔ یوروگوائے جنوبی امریکہ انتخابی مقابلوں میں مسلسل تیسری دفعہ پانچواں مقام حاصل کرکے دوبارہ شمالی امریکہ سے دو میچوں کی انتخابی مقابلہ کھیلنے پر مجور ہوگئی۔ لیکن 2006 کے برعکس اس دفعہ نوجوان اور تجربہ کار کھلاڑیوں کے میلاپ نے کوسٹا ریکا کے خلاف بہترین کارکردگی کا مظاہرہ کیا اورکامیابی حاصل کرکے ایک بار پھر فیفا عالمی کپ 2010 میں کھیلنے کا اعزاز حاصل کرلیا۔

گزشتہ فیفا عالمی کپ شرکت

اب تک یوروگوائے نے گزشتہ 10 فیفا عالمی کپ مقابلوں میں حصہ لیا۔ جس میں فیفا کا اولین عالمی کپ 1930 میں بحیثیت میزبان فتح حاصل کی، اور پھر 1950 عالمی کپ میں فائنل میں برازیل کو شکست دے کر دوبارہ یہ عالمی اعزاز جیتا۔ یوروگوائے کی آخری بہترین کارکردگی 1970 عالمی کپ مقابلوں میں تھی جہاں پراس نے چوتھا مقام حاصل کیا۔

اہم کھلاڑی

ڈئیگوفورلان (Diego Forlan)

ڈئیگو لوگانو (Diego Lugano)

لوئس سوریز (Luis Suarez)

انتہائی تجربہ کار منیجر اوسکرواشنگٹن تاباریز (Oscar Washington Tabarez) کی موجودگی میں حالیہ اچھی کارکردگی کی بنیاد پریہ کہا جاسکتا ہے کہ یوروگوائے فیفا وڑلڈکپ 2010 میں اچھے کھیل کا مظاہرہ کرے گی لیکن اس کے لیے دوسرے مرحلے تک پونہچنا ناممکن نہیں تو انتہائی کھٹن ضرورہے۔

میری پیشن گوئی : اس گروپ میں سے فرانس اور میکسیکو اگلے مرحلے میں جاسکتے ہیں، لیکن جنوبی افریقہ میزبانی کا فائدہ اٹھا کرمیکسیکو اور فرانس کو پریشان کرسکتا ہے۔

فیفا وڑلڈکپ 1994 حصہ پنجم - FIFA World Cup USA Part 5

2010-06-06T06:52:00.006+08:00

فیفاوڑلڈکپ ریاست حائے متحدہ امریکہ 1994 (FIFA World Cup USA 1994) فیفا نے شمالی امریکہ کے ملک ریاست حائے متحدہ امریکہ (USA) میں پندرہواں فیفا عالمی کپ منعقد کرنے کا اعلان کیا تو دنیائے فٹبال میں سبھی نے ناک بھوں چڑھائے اوراس فیصلے پر سوالات اٹھائے گئے اور سخت تنقید کی گئی۔ کیونکہ امریکی عوام بیس بال، باسکٹبال اور امریکن فٹبال کے اس حد تک دیوانے ہیں کہ ان کھیلوں کے سوا کسی اور کھیل کو دیکھنا تو درکنار کھیلنے میں بحی دلچسپی نہیں لیتے۔ ایسے میں تنقیدنگاروں کے مطابق ایسے ملک میں فیفا عالمی کپ منعقد کرنا غلطی ہے اوران امیدواروں سے زیادتی ہے جن عوام فٹبال کھیل سے محبت کرتے ہیں۔

امریکہ میں فٹبال کو“سوکر“ کہا جاتا ہے اور وہاں اس کھیل کو باسکٹبال کے این بی اے (NBA)، بیس بال کے ینکیز (Yankees) وغیرہ نے مکمل طور پر میدان سے باہر نکالا ہوا ہے۔ اسی وجہ سے USA کی فٹبال ٹیم بھی ایک اوسط درجے کی ٹیم ہے۔ لیکن جب فیفا وڑلڈکپ 1994 کے مقابلے شروع ہوئے تو امریکیوں نے پوری دنیا کو حیران کردیا، ہر میچ میں شائقین جھوک در جھوک میدانوں میں آنے لگے اور ایک میلہ جیسا سماں بنادیتے۔ فیفا وڑلڈکپ کی تاریخ میں ایک ریکارڈ 35 لاکھ سے زیادہ فٹبال شائقین نے فیفا عالمی کپ 1994 دیکھا اور امریکی شائقین نے کاروباری لحاظ سے فیفا کے لیے فیفا عالمی کپ 94 ایک انتہائی کامیاب عالمی کپ بنانے میں اپنا بنیادی کردار ادا کیا۔

اس دفعہ فیفا وڑلڈکپ کے فائنل مقابلوں میں کھیلنے کے لیے انتخابی مقابلوں میں بھی ریکارڈ 147 ملکوں نے حصہ لیا، لیکن حیرت انگیز طور پر یورپی چیمپیئن ڈنمارک، فرانس اور انگلینڈ انتخابی مقابلے ہار کرامریکہ 94 عالمی کپ میں شرکت نہ کرسکے۔

فیفا وڑلڈ کپ 94 ڈئیگومیراڈونا اور ان کے پرستاروں کے لیے انتہائی منہوس ثابت ہوا۔ اسی وڑلڈکپ میں میراڈونا نے ممنوعہ ادویا ت استعمال کی تھیں جس کی پاداش میں انہیں مقابلوں سے باہر کردیا گیا تھا اور یہیں سے میراڈونا کے ستارے گردش میں آگئے۔ آگے جاکر دنیائے فٹبال کے عظیم ثپوت میراڈونا کوکین کے عادی ہوگئے جس کی وجہ سے انہوں نے اپنی زندگی کا انتہائی کربناک وقت دیکھا۔ یہاں تک ایک دفعہ تو وہ موت کے منہ سے واپس آئے۔ فیفا وڑلڈکپ میں اس منفی واقعے نےارجنٹائن ٹیم پر بھی انتہائی برااثرڈالا اور ابتدائی مرحلے میں ہی بری طرح ہار کر گھر واپس چلی گئی۔

ایک اور افسوناک واقعہ جنوبی امریکی ٹیم کولمبیا (Colombia) کے کھلاڑی انڈریس ایسکوبر (Andres Escobar) کے ساتھ ہوا۔ کولمبیا نے انتخابی مقابلوں میں انتہائی شاندار کھیل کا مظاہرہ کیا جس کی وجہ سے تجزیہ نگاروں نے اسے ایک سخت حریف اور عالمی کپ امیدوار کے پر طور پر پیش کیا۔ جس سے کولمبین عوام نےاپنی ٹیم سے بہت زیادہ توقعات لگا لیں۔ لیکن جب مقابلے شروع ہوئے تو کولمبیا کی انتہائی خراب کارکردگی نے پوری دنیا کو حیران کردیا۔ اس پس منظر میں یوایس اے (USA) کے خلاف ایک اہم میچ کے دوران دفاعی کھلاڑی انڈریس ایسکوبر نےغلطی سے بال کو اپنےہی گول میں ڈال دیا جس کی وجہ سے توقعات کے برعکس کولمبیا حیرت انگیزطور پر ابتدائی مرحلے میں ہی مقابلوں سے باہر ہوگئی۔ جب ٹیم واپس اپنے ملک پہنچی تو ایک جنونی شیدائی نے انڈریس ایسکوبر کا قتل کردیا۔

فیفا عالمی کپ 94 میں بھی 24 ملکوں کی ٹیموں نے 52 مقابلوں میں حصہ لیا۔ گزشتہ عالمی کپ کے برعکس اس دفعہ زیادہ تر ٹیموں نے جارحانہ حکمت عملی ترتیب دی جس کی وجہ سے فیفا وڑلڈکپ 1982 کے بعد پہلی دفعہ زیادہ تعداد 141 گول بنے۔ اس بار افریقی کپ آف نیشن کا چمپیئن نائیجیریا (Nigeria) اور ایشیاء سے سعودی عرب پہلی دفعہ شرکت کررہے تھے۔ نائیجیریا (Nigeria) نے انتہائی شاندار کھیل کا مظاہرہ کیا اور دوسرے مرحلے میں اٹلی سے انتہائی سنسنی خیزسخت مقابلہ کرکے میچ کےآخری لمحات میں ہارگئی۔ سودی عرب نے بھی مراکش اور بلجیئم کو ہرایا اور دوسرے مرحلے تک پہنچ کر سب کو حیران کردیا تھا۔

کواٹرفائنل میں اٹلی نے سپین کو آسانی سے شکست دے کرسیمی فائنل میں اپنی جگہ بنا لی۔ بلگاریہ نے شاندار کھیل کے ذریعے دفاعی چمپیئن جرمنی کو گھر کی راہ دکھائی تو برازیل کے حملہ آور جوڑی روماریو (Romario) اور بیبیٹو (Bebeto) نے اپنے جارحانہ کھیل کے ذریعے انتہائی سنسنی خیز مقابلے کے بعد ہالینڈ (Netherland) کی امیدوں پر ایک دفعہ پھر پانی پھیر دیا۔ سویڈن (Sweden) نے رومانیہ (Romania) کو ایک سخت مقابلے کے بعد پینلٹیز کے ذریعے شکست دے کر 36 سال کے بعد پہلی دفعہ سیمی فائنل میں کھیلنے کا اعزاز پایا۔

فیفا عالمی کپ 94 کے پہلے سیمی فائنل میں اٹلی (Italy) نے بلگاریہ (Bulgaria) کو ایک کے مقابلے میں دو گول سے شکست دے کر بلگاریین کی شاندار پیش قدمی روک دی، یاد رہے کہ اس فیفاوڑلڈکپ سے پہلے بلگاریہ عالمی کپ کے گزشتہ سولہ مقابلوں میں ایک کامیابی بھی حاصل نہ کرپائی تھی۔ برازیل (Brazil) نے سویڈن کو ایک گول سے ہرا دیا۔ اوراسطرح عالمی کپ کا فائنل منہ میں پانی بھرآنے والا مقابلہ تین دفعہ سابق عالمی چمپیئن برازیل اور تین ہی دفعہ سابق عالمی چمپیئن اٹلی کے درمیان طے ہوا۔

لیکن توقعات کے برعکس فیفا وڑلدکپ 1994 کا فیصلہ کن مقابلہ شائقین کے لیے مایوس کن ثابت ہوا کیونکہ دونوں ٹیمیں انتہائی دفاعی حکمت عملی کے ساتھ میدان میں اتریں، دونوں ٹیموں کے پاس بہترین حملہ آور کھلاڑیوں کی موجودگی کے باوجود مقررہ وقت اور پھر اضافی وقت میں بھی گول کرنے میں ناکام ہوگئی جس کے بعد فیفا عالمی کپ کی تاریخ میں پہلی بار پینلٹیز کے ذریعے دنیائے فٹبال کے سب سے بڑے اعزاز فیفا وڑلڈکپ کا فیصلہ ہوا.

اٹلی کے عظیم کھلاڑی روبیٹوباجیو (Roberto Baggio) جس نے اپنے شاندارکارکردگی سے اٹلی کو اس مرحلے تک پہنچایا تھا کے ساتھ اس وقت قسمت کی دیوی نے سنگین مذاق کیا جس وقت اسے اس کی سخت ضرورت تھی۔ روبیٹوباجیوجب آخری کک لگانے آئےتو اس کی دائیں ٹانگ کے زخمی پٹھے میں درد کم کرنے کی خاطر پٹیوں کے ذریعے سختی سے باندھی گئی تھی، لیکن اس کے باوجود اس بہادر اورمضبوط اعصاب کے مالک کھلاڑی نے ہمت سے کام لیا اور آخری کک لگانے کے لیے آگے بڑھے، لیکن جیسے ہی روبیٹوباجیو نے کک لگائی گیند گول کی طرف جانے کے بجائے آسمان کی طرف ہوا ہوکر گول کے پیچھے شائقین میں گم ہوگئی. اور اسطرح برازیل 24 سال بعد چوتھی دفعہ عالمی چمپیئن بن گیا اور روبیٹوباجیو ایک لمحے میں ہیروسے زیرو۔

فیفا فٹبال وڑلڈکپ 1990- چوتھا حصہ - FIFA World Cup 1990 Part 4

2010-06-05T17:51:00.003+08:00

اس فیفا وڑلڈکپ تعارفی سلسلے کی گزشتہ تحاریر فیفا فٹبال وڑلڈکپ 1930 تا 1954، دوسرا حصہ فیفا فٹبال وڑلڈکپ 1958 تا 1974 اور تیسرا حصہ فیفا فٹبال وڑلڈکپ 1978 تا 1986 تمام وڑلڈ کپ کے بارے میں پڑھا ہے، سنا ہے اور پرانی ویڈیوز میں دیکھا ہے لیکن اب اگلی تحاریر میں 1990 تا 2006 تک کے جن فیفا وڑلڈکپ کا ذکر ہوگا یہ تمام میں نے براہ راست ٹیلی ویژن پر دیکھیں ہیں اور کم و بیش ہر مقابلہ دیکھا ہے ۔ ان فیفا وڑلڈکپ سے میری بہت ساری اچھی بری یادیں وابستہ ہیں۔

1990 سے پہلے ہمارے گھر میں چودہ انچ کا سادہ کلر ٹیلی ویژن ہوتا تھا۔ مجھے یہ تو یاد نہیں ہے کس برانڈ کا تھا لیکن اتنا یاد ہے کہ چھوٹا سا سفید رنگ کی باڈی کے ٹیلی ویژن سے مجھے بے حد نفرت تھی، روزانہ ہی اس کی پٹائی ہوتی لیکن وہ اپنی حرکت سے باز نہیں آتا۔ ایک تو ٹھیک اسی وقت سگنل چھوڑ دیتا جب کوئی اہم پروگرام چل رہا ہوتا اور دوسرا ہمارے محلے کی بیٹھک میں لکڑی کی الماری میں بند بڑا ٹیلی ویژن (غالبا ٢١ انچ کا ہوگا) تھا۔ رنگین تو وہ بھی نہیں تھا لیکن اُس میں پروگرام اور کرکٹ میچز دیکھنے کے بعد اپنا ٹیلی ویژن اور بھی چھوٹا محسوس ہوتا۔

سال 1990 آیا اپنے ساتھ ہانگ کانگ سے بھائی بھی لے آیا جس کےساتھ ٢١ انچ، نیشنل برانڈ کا نیا رنگین ٹیلی ویژن بھی گھر آگیا۔ میں نے زندگی میں پہلی بار رنگین ٹی وی کے پردہ سکرین پر پروگرام دیکھے تو انتہائی خوشگوار حیرت سے ہکہ بکہ رہ گیا جیسے اب تک تو سادہ سکرین پر پروگرام دیکھ کر اپنے آپ پر ظلم کررہا تھا۔ بھائی نے کہا فٹبال وڑلڈکپ شروع ہونے والا ہے ایک ساتھ دیکھیں گے۔ مجھے فیفا وڑلڈکپ دیکھنے سے زیادہ اس بات کی خوشی تھی کہ پروگرام رنگین ٹی وی پر دیکھیں گے کیونکہ اس وقت میں صرف کرکٹ کھیل کا ہی دلدادہ تھا، کرکٹ کے گرد ہی میری زندگی گومتی تھی۔گرمیوں کا موسم تھا ہم نے ٹی وی صحن میں میں رکھ کر فیفا وڑلڈکپ 1990 کی افتتاحی تقریب دیکھی۔ تقریب کا آغاز بڑی دھوم دھام سے ہواجسےدیکھ کر بہت مزہ آیا۔ فیفا وڑلڈکپ 1990 پاکستان ٹیلی ویژن نے براہ راست نشر کیا۔

فیفا وڑلڈکپ 1990 میں مغربی جرمنی نہ صرف اپنے بہترین دفاعی کھیل کی وجہ سے، ان کی ٹیم کٹ کےشانوں پر جرمن جھنڈا کی خوبصورتی کی وجہ سے بھی دنیا بھر کے شائقین کےدل دماغ پر چھاگیاتھا۔

فیفاوڑلڈکپ اٹلی 1990 (FIFA World Cup Italy 1990) یورپین ملک اطالیہ (Italy) میں 56 سال بعد دوسری دفعہ منعقد ہوا۔ 1938 میں اٹلی اپنی سرزمین پرعالمی چمپیئن بنا تھا اور اس باربھی اطالین عوام کو اپنی ٹیم سےتوقعات وابستہ تھیں۔ اس فیفا وڑلڈکپ کے فیصلہ کن مقابلوں میں بھی 24 ملکوں کی ٹیموں نے 52 مقابلوں میں حصہ لیا۔ اس دفعہ زیادہ تر ٹیموں نے دفاعی کھیل کے گرد حکمت عملی ترتیب دی جس کی وجہ سے فیفا عالمی کپ کی تاریخ میں پہلی دفعہ کم تعداد میں گول بنے۔ اس بار کوسٹا ریکا،(Costa Rica) اور آئرلینڈ پہلی دفعہ شرکت کررہے تھے۔ آئرلینڈ (Republic of Ireland) نے اپنے پہلے وڑلڈکپ میں ہی کواٹرفائنل تک رسائی حاصل کرکے سب کو حیران کردیا تھا لیکن فیفا وڑلڈ کپ 1990 کے یادگار لمحات میں سے ایک ابتدائی میچ تھا جس میں مضبوط اور کسی حد تک مغرور ارجنٹائن (Argentina) کو کیمرون المعروف منہ زور شیروں (The Indomitable Lions) نے حیران کن شکست دی۔

انگلستان کے گیری لنکر(Gary Lineker) نے آخری لمحات میں پینلٹی ککس کی مدد سے دو گول کرکے کیمرون کی سیمی فائنل کی طرف پیش قدمی تو روک دی لیکن پھر بھی کیمرون کےدھاڑتے شیروں کی گونج دنیا بھر میں سنی گئی۔

اس میچ میں کیمرون کے 38 سالہ حملہ آور روجرمیلا (Roger Milla) جس کو فٹبال سے خانہ نشینی لینے کے باوجود ان مقابلوں میں کھیلنے پر راضی کیا گیا تھا نے اپنے زندگی کا یادگار کھیل پیش کیا۔ آگے جاکرکیمرون نے رومانیہ (Romania) اور کولمبیا (Colombia) کوہرا کر کواٹرفائنل میں کھیلنے کا پہلے افریقی ملک ہونے کااعزاز حاصل کرلیا۔ کیمرون نے قریب قریب سیمی فائنل میں بھی پہلا قدم رکھ لیا تھا جب کھیل کے اختتام سے دس منٹ پہلے تک انگلستان (England) پر ایک گول کے مقابلے میں دو گول سے برتری حاصل کرلی تھی، لیکن انگلستان کے گیری لنکر(Gary Lineker) نے آخری لمحات میں پینلٹی ککس کی مدد سے دو گول کرکے کیمرون کی پیش قدمی روک دی لیکن پھر بھی کیمرون کےدھاڑتے شیروں کی گونج دنیا بھر میں سنی گئی۔

انگلینڈ کیمرون کو ہرا کر 1966 کے بعد پہلی دفعہ کوچ سربوبی روبسن (Sir Bobby Robson) کی راہنمائی اور انتہائی باصلاحیت, نہ ختم ہونے والی ہمت و قوت کے حامل پال گوسکائن (Paul Gascoigne)، نے سٹیورٹ پیرس (Stuart Pearce) ، برائن روبسن (Bryan Robson)، نوجوان سٹیومکموہن (Steve Mcmahon) ، اور جان بارنیس (John Barnes) کے ساتھ مل کر شاندار کھیل کا مطاہرہ کیا جس کی بدولت انگلستان سیمی فائنل میں پہنچاجس نےانگلینڈ کے فٹبال شائقین کی توقعات اور امیدیں اپنی ٹیم سےحد سے زیادہ بڑھا دیں۔ انگلینڈ نے سیمی فائنل میں اپنے روایتی حریف مغربی جرمنی جیسی مضبوط ٹیم کو ٹکر کا مقابلہ دیا لیکن انتہائی سخت مقابلہ کرنے اور میچ جیتنے کی ہر ممکن کوشش کے باوجود قسمت کی دیوی ان پر مہربان نہیں ہوئی بالآخر اضافی وقت لینے کے بعد بھی جب مقابلہ برابری پر ختم ہوا تو پینلٹیز کے ذریعے فیصلہ ہونا تھا جس میں مغربی جرمنی جس کووقت کے بہترین کھلاڑیوں لوتھر میتھیوئس،( Lothar Matthaus) جیورگن کلینسمن (Jurgen Klinsmann) اور انڈریاس بریمے (Andreas Brehme) اور کوچ فرانز بیکن بیور (Franz Beckenbauer) کی خدمات حاصل تھیں تجربے، مضبوط اعصاب کی وجہ سے فتح ہوئی اور چھٹی بار فیفاوڑلڈکپ کے فائنل میں کھیلنے کا اعزاز حاصل کرلیا۔

انگلستان اور مغربی جرمنی کے درمیان سیمی فائنل میں پال گوسکائن کے بلک بلک کر رونا فیفا وڑلڈ کپ 1990 کے یادگار لمحات میں سے ہے جس نے پال گوسکائن کو انگلستانی فٹبال شائقین میں لاڈلا ہیرو بنا دیا۔

میزبان اطالیہ ٹیم کے زیادہ تر کھلاڑیوں نےتوقعات کے برعکس وہ کھیل پیش نہیں جیسے ان سے اطالوی فٹبال شائقین کی امیدیں تھیں۔ دوسری طرف دفاعی چیمپیئن ارجنٹیناجوفیفا وڑلڈکپ 1986 والی ٹیم کی پرچھائی لگتی تھی کوابتدائی میچ میں تو کیمرون نے شکست دی دے تھی لیکن ڈئیگومیراڈونا (Diego Maradona)کی موجودگی اور کچھ انفرادی شاندار کھیل جن میں کلاؤڈیو کینیجیا (Claudio Caniggia) جس نے برازیل کے خلاف اہم گول کیا اور گول کیپر سرجیو گوئیکوشیا (Sergio Goycochea) جس نے پہلے برازیل (Brazil) کے ساتھ میچ میں شاندار گول بچائے اور پھر کواٹرفائنل میں یوگوسلاویا (Yugoslavia) کےخلاف مردِ میدان کھیل کا مظاہرہ کیا شامل ہیں، جس وجہ سے ارجنٹیا جیسے تیسے کرکےسیمی فائنل میں پہنچ گئی ۔ تب تک ارجنٹیا کو ہوش آگیا تھا اور سیمی فائنل میں اطالیہ کے خلاف کچھ حد تک اچھا کھیل کا مظاہرہ کرکے مسلسل دوسری دفعہ عالمی کپ کے فائنل میں کھیلنے کا اعزاز حاصل کرلیا۔

مغربی جرمنی کے کوچ فرانز بیکن بیور دنیائے فٹبال میں دوسرے شخص ہیں جنہوں نے پہلے کھلاڑی کی حیثیت سے 1974 میں اور پھر کوچ کی حیثیت سے 1990 میں فیفا عالمی کپ جیتا۔

فیفا وڑلڈ کپ 1990 فائنل اب تک کے مقابلوں جیسا ہی تھا یعنی جس میں دفاعی کھیل کھیلاگیا اور میچ 85 منٹ تک کوئی بھی ٹیم گول نہ کرسکی 86 منٹ میں مغربی جرمنی نے پینلٹی کک جیت لیا جس کو انڈریاس بریمے نے گول میں تبدیل کردیا اور مغربی جرمنی تیسری دفعہ عالمی فاتح بن کر اٹلی اور برازیل کے ساتھ دنیائے فٹبال کے سپر پاور کی صف میں جگہ حاصل کرلی۔ سولہ سال پہلے 1974 میں بحیثیت مغربی جرمنی کے کپتان عالمی کپ فرانز بیکن بیور نے اپنے ہاتھوں میں اٹھایا تھا اور اب 1990 میں ایک دفعہ پھر کوچ کی حیثیت سےدنیائے فٹبال کا سب سے بڑا کارنامہ انجام دے کر منفرد اعزاز کے حاصل کرلیا۔

فیفافٹبال وڑلڈکپ ١٩٧٨ تا ١٩٨٦ تیسرا حصہ - FIFA World Cup 1978 to 1986 Part 3

2010-06-03T19:32:00.006+08:00

(آپ کی پسندیدہ فٹبال ٹیم کون سی ہے ؟ آپ کا پسندیدہ فٹبال کھلاڑی کون ہے ؟ براہ مہربانی کسی پس و پیس کے بغیر تبصرے کیجیئے اور اپنی رائے اور خیالات کا اظہار کریں)

فیفاوڑلڈکپ ارجنٹینا (FIFA World Cup Argentina 1978) ١٩٧٨میں جنوبی امریکہ کے ملک ارجنٹینا (Argentina) میں منعقد ہوا جس کے فیصلہ کن مقابلوں میں سولہ ملکوں کی ٹیموں نے اٹھتیس مقابلوں میں حصہ لیا۔ اس وڑلڈکپ میں ارجنٹائن کے ماریئوالبرٹو کیمپس (Mario Alberto Kempes) نے آخری مرحلے میں بہترین کھیل کا مظاہرہ کرکے اولین فیفاوڑلڈکپ کے فائنلسٹ کو بالآخر دنیائے فٹبال کا سب بڑا اعزاز دلا کر ارجنٹائن عوام کو خوشی سے پاگل کردیا۔ اگر ایک طرف انگلستان (England) کی ٹیم نے مسلسل دوسری دفعہ فیفا وڑلڈکپ کے انتخابی مقابلوں میں ناکامی دیکھی تو اسی وڑلڈکپ میں افریقن ٹیم تیونس (Tunisia) جو پہلی دفعہ ان مقابلوں میں شرکت کررہی تھی میکسیکو کو ہرا کسی بھی افریقی ٹیم کی فیفا وڑلڈکپ میں پہلی کامیابی کا اعزاز حاصل کیا۔ دوسری طرف ایشیاء سے پہلی بار شرکت کرنے والی ایران (Iran) ٹیم نے بھی سکاٹ لینڈ (Scotland) کے ساتھ مقابلہ برابر کرکے ایک پوائنٹ جیتا۔ ہالینڈ (Netherland) جس نے ایک بار پھرانتہائی خوبصورتی اور بہترین ہنرمندی اور حمکت عملی کے ذریعے کامیابیاں حاصل کرکے فائنل میں پونہچی، لیکن قسمت نے ان کا ساتھ اس دفعہ بھی نہیں دیا اوراسے ایک بار پھر آخری رکاوٹ پار کرنے میں ناکامی ہوئی۔ ارجنٹینا نے اضافی وقت میں دو گول کرکے ہالینڈ کو ایک کے مقابلے میں تین گول سے شکست دے دی۔ ایک طرف ارجنٹائن کھلاڑی اور پورا ارجنٹینا خوشی میں پاگل ہوئے جارہا تھا تو دوسری طرف ہالینڈ کے کھلاڑیوں کے آنکھوں میں آنسو تیررہے تھے۔

فیفاوڑلڈکپ سپین (FIFA World Cup Spain 1982) ١٩٨٢میں یورپی ملک سپین (Spain) میں منعقد ہوا جس کے فیصلہ کن مقابلوں میں پہلی بارچوبیس ملکوں کی ٹیموں نے باون مقابلوں میں حصہ لیا۔ اطالیہ (Italy) کے لیے اس وڑلڈکپ میں پاؤلو روسی (Paolo Rossi) زیرو سے ہیرو بن کر آخری مرحلے کےمقابلوں میں انتہائی شاندارکھیل کا مظاہرکرکے اٹلی کو تیسری دفعہ فیفا وڑلڈکپ کا اعزاز دلایا۔ پاؤلوروسی میچ فکسنک میں ملوث ہونے کے پاداش میں دوسال کی پابندی کے بعد اٹلی کے لیے کھیل رہاتھا اور ابتدائی مراحل میں اسے مکمل ناکامی کا سامنا کرنا پڑا۔ اٹلی سے قسمت نے بھرپور ساتھ دیا اور وہ کسی نہ کسی طرح اگلے مرحلے میں پہنچ گئی جس میں پاؤلوروسی نے تین گول کرکے برازیل کو وڑلدکپ سے باہر کردیااور سیمی فائنل میں بھی پولینڈ کے خلاف دو گول کرکے اٹلی کو فائنل میں پہنچانے میں بنیادی کردار ادا کیا۔ اس بار فیفا وڑلڈکپ میں پہلی دفعہ چوبیس ٹیموں نےحصہ لیاجن میں چھ ٹیموں نے پہلی دفعہ شرکت کی، افریقہ سےالجزائر (Algeria) اورکیمرون (Cameroon) شمالی اور وسطی امریکہ سے ایلسواڈور (El Salvador) اور ہونڈورس (Honduras) اور ایشاء سے کویت (Kuwait) شامل ہیں۔ ان میں الجزائرنے مغربی جرمنی (West Germany) کو شکست دے کر دنیائے فٹبال کو حیران کردیا اور کیمرون بھی پہلے مرحلے میں ناقابل شکست رہی لیکن بدقسمتی سےاٹلی کے مقابلے میں کم گول کرنے کی وجہ سے اگلے مرحلے میں نہ پونہچ سکی۔ فرانس اور مغربی جرمنی کے درمیان سیمی فائنل انتہائی سنسنی خیزمقابلے کے بعد بھی برابری پر ختم ہوا اور وڑلڈکپ میں پہلی دفعہ مقابلے کا فیصلہ پینلٹیز (Penalties) پر ہوا۔ فائنل میں اٹلی نے آسانی سے مغربی جرمنی کو ایک کے مقابلے میں تین گول سے ہراکر تیسری دفعہ وڑلڈکپ کا اعزاز اپنے نام کرلیا۔

فیفاوڑلڈکپ میکسیکو (FIFA World Cup Mexico 1986) ١٩٨٦میں سولہ سال بعد ایک دفعہ پھر فیفا وڑلڈکپ میکسیکو (Mexico) میں منعقد ہوا کیونکہ کولمبیا (Colombia) نے معاشی حالات کی وجہ سے معذرت کرلی اور میکسیکو دو دفعہ فیفا وڑلڈکپ منعقد کرنے کا اعزاز حاصل کرنے والا پہلا ملک بن گیاتھا۔ اس دفعہ بھی فیصلہ کن مقابلوں میں چوبیس ملکوں کی ٹیموں نے باون مقابلوں میں حصہ لیا۔ ١٩٧٠ کے وڑلڈ کپ میں برازیل نے شاندار کھیل کا مظاہرہ کرکے دنیائے فٹبال کے شائقین کے دل جیت لیے تھے، اس دفعہ باری ارجنٹینا کی تھی جس کے کپتان ڈئیگوارمنڈومیراڈونا المعرف میراڈونا (Diego Armando Maradona) نے اپنے خوبصورت، جارحانہ اورشاہکار ہنرمند کھیل کے بدولت فٹبال شائقین کو چاہے وہ دنیا کے کسی بھی کونے میں رہتے ہوں اپنا دیوانا بنادیا۔ ارجنٹیا کے چودہ گول جس نے اسے دوسری دفعہ فیفا وڑلڈکپ کا اعزاز دلایا پانچ گول میراڈونا نے خود کیئے اور پانچ گول کرنے میں بنیادی کردار ادا کیااوربرازیلین پیلے (Pele) کے بعد دوسرا واحد کھلاڑی بن گیا جس نے تن تنہا فیفا وڑلڈکپ کا میلہ لوٹ لیا۔ یہ وہی فیفاوڑلڈکپ ہے جس میں کواٹرفائنل مقابلے میں ارجنٹینا نے انگلستان (England) کو ایک کے مقابلے میں دو گول سے شکست دی جس میں ڈئیگومیراڈونا کا پہلا گول بقول میراڈونا کے “خدائی ہاتھ“ (Hand of God) سے ہوا جس پر بہت لہن تعن ہوئی خاص طور پر انگلستان سے اور آج بھی ہورہی ہے، لیکن دوسرا گول جسے صدی کا بہترین گول کا خطب ملا (Goal of the Century) میراڈونا کے خلاف تمام لہن تعن کو پانی کے بلبلے بنا دیتاہے (یوٹیوب پر صدی کا بہترین گول دیکھیئے) اور اس کے سخت دشمن بھی اس کے آگے تعظیم میں سر جھکا دیتے ہیں، “خدائی ہاتھ“ گول کے صرف تین منٹس بعد ڈئیگومیراڈونا اپنے ہالف سے گیند لیتا ہے اور انگلستانی گول پر حملہ آور ہوتے ہوئے پانچ انگلستانی کھلاڑیوں کو چکمے دیتا ہواانہیں تنگی کا ناچ نچاتا ہوا گیند کو گول میں ڈال کر سیمی فائنل میں اپنی ٹیم جگہ بنا دیتا ہے۔ اس دفعہ پہلی بار شرکت کرنے والوں میں ڈنمارک، (Denmark) کینیڈا (Canada) اور عراق (Iraq) شامل تھے جس میں ڈنمارک نے جارحانہ کھیل کا مظاہرہ کرکے تین فتوحات حاصل کیں۔ اسی وڑلڈ کپ میں افریقی ملک مراکش (Morroco) نے پہلی دفعہ اگلے مرحلے میں پونہچ کر تاریخ رقم کی۔ ڈئیگومیراڈونا کی شاندار کھیل کی بدولت ارجنٹینا فائنل میں پونہچ گئی جہاں اس کا مقابلہ چوتھی دفعہ فائنل کھیلنے کا اعزاز پانے والی مغربی جرمنی (West Germany) کے ساتھ تھا جس کے لوتھرمیتھوئس (Lothar Matthaus) نے میراڈونا کو صحیح معنوں میں ناکوں چنے چبوائے۔ شروع میں ارجنٹنا نے دو گول کی برتری حاصل کی لیکن مغربی جرمنی نےسخت مقابلہ کرکے دو دو گول سے مقابلہ برابر کردیا، کھیل کے اختتام سے سات منٹس قبل ڈئیگو میراڈونا کے تخلیقی پاس کی بدولت جورج بوروشاگا (Jorge Burruchaga) نے تیسرا گول کرکے ارجنٹینا کودوسری دفعہ عالمی چمپیئن بنادیا اور ڈئیگو میراڈونا دنیائے فٹبال کا دیوتا بن کر امر ہوگیا۔

(جاری ہے)

اس فیفا وڑلڈکپ تحریری سلسلے کا پہلا حصہ یہاں سے پڑھ سکتے ہیں۔
اس فیفا وڑلڈکپ تحریری سلسلے کا دوسرا حصہ یہاں سے پڑھ سکتے ہیں۔

فیفا فٹبال وڑلڈکپ ۱۹۵۸ تا ۱۹۷۴ دوسرا حصہ - FIFA World Cup 1958 to 1974 - Part 2

2010-06-02T04:01:00.003+08:00

اس فیفا وڑلڈکپ تحریری سلسلے کا پہلا حصہ یہاں سے پڑھ سکتے ہیں۔

فیفاوڑلڈکپ سویڈن(FIFA World Cup Sweden 1958) ١٩٥٨میں یورپی ملک سویڈن (Sweden) میں منعقد ہوا جس کے فیصلہ کن مقابلوں میں سولہ ملکوں کی ٹیموں نے 35 مقابلوں میں حصہ لیا۔ یہ وہی وڑلڈکپ ہے جس میں شہرہ آفاق عظیم فٹبال کھلاڑی ایڈیسن آرنٹیس ڈو نسثی منٹو (Edison Arantes do Nascimento) المعروف پیلے نے سترہ سال کی عمر میں اپنے ملک برازیل (Brazil) کو پہلی دفعہ فٹبال کا سب بڑا اعزاز دلا کردنیائے فٹبال میں اپنی آمد کا اعلان کیا۔ اسی وڑلڈکپ میں سترہ سالہ پیلے اور انتہائی باصلاحیت مانیئول فرانسیسکو ڈوس سنٹوس (Manuel Francisco dos Santos) المعروف گارینشا ننّا پرندہ ("little bird" Garrincha) کی حملہ آورجوڑی نے مخالف دفاعی لائن کی راتوں کی نیندیں حرام کردیں۔ فائنل میں سویڈن کو دو کے مقابلے میں پانچ گول سے شکست دے کربرازیل تاریخ میں پہلی ٹیم بن گئی جس نے وڑلڈ کپ دوسرے براعظم پر جیتا۔ اسی وڑلدکپ میں پہلی دفعہ ٹیلی ویژن پر مقابلے دکھائے گئے۔

فیفاوڑلڈکپ چیلی (FIFA World Cup Chile 1962) ١٩٦٠ میں صدی کا سنگین ترین زلزے کی آفت آنے کے باوجود چیلی (Chile) نے ارجنٹیائن سےساتویں فٹبال وڑلدکپ کے حقوق جیت لیے۔ ١٩٦٢ میں اس وڑلڈکپ کے فیصلہ کن مقابلوں میں سولہ ملکوں کی ٹیموں نے 32 مقابلوں میں حصہ لیا۔ اس وڑلڈکپ میں پیلے تو ابتدائی مراحل میں ہی زخمی ہوکر مقابلوں سے باہر ہوگیا لیکن اس کا جوڑی دارگارنشیا المعروف ننّا پرندہ (little brid) اپنے کھیل کے عروج پرپہنچ شاہکار کھیل کا مظاہرہ کرتے ہوئے برازیل کو اپنے اعزاز کا کامیاببی سے دفاع کرنےمیں اپنا بھرپور کردار ادا کیا۔ فائنل میں برازیل نے ایک کے مقابلے میں تین گول سے چیکوسلواکیہ (Czechoslovakia) کوشکست دے کرمسلسل دوسری دفعہ دنیائے فٹبال کے سب سے بڑے اعزاز فیفا وڑلڈکپ کا فاتع بن گیا۔
گارشیا ننا پرندہ

فیفاوڑلڈکپ انگلستان (FIFA World Cup England 1966) ١٩٦٦ میں بالآخر فٹبال کھیل ایجاد کرنے والے انگریزوں کے دیس انگلستان میں پہلا وڑلڈکپ منعقد ہوا جس کے فیصلہ کن مقابلوں میں سولہ ملکوں کی ٹیموں نے 32 مقابلوں میں حصہ لیا۔ اس وڑلڈ کپ میں بوبی مورے اور بوبی چارلٹن سے انگلستان کو بہت سی توقعات تھیں لیکن اصل ہیرو گمنام جیوف ہورسٹ بن گئے جس نے فائنل میں ہیٹ ٹرک کرکے انگستان کی فتع میںبنیادی کردار ادا کیا۔ یہ وڑلڈکپ انتہائی دلچسپ مقابلوں کے علاوہ دیگر تنازعات کی وجہ سے بھی یاد رکھا جائے گا جیسے جنوبی امریکہ کی ٹیمیں زیادتی و درشتی کی شکایت کے ساتھ واپس چلی گئیں۔ شمالی کوریا کے ہاتھوں اطالیہ کی حیرت انگیزطور پر ابتدائی مرحلے کے مقابلوں سے باہر نکل جانا۔ جولیس ریمٹ کپ کی چوری ہوگئی جسے ایک کتے نے لنڈن کے ایک گارڈن سے ڈھونڈ نکالاتھا۔ بہرحال انگلستان نے انتہائی سنسنی خیز مقابلے کے بعد ویمبلے سٹیڈیم میں مغربی جرمنی کو دو کے مقابلے میں چار گول سے شکست دے کروڑلڈکپ کا اعزاز اپنے نام کرلیا جو آج تک کسی بھی بڑے فٹبال ٹورنمنٹ میں انگلستان کی واحد کامیابی ہے۔

فیفاوڑلڈکپ میکسیکو(FIFA World Cup Mexico 1970) ١٩٧٠میں شمالی امریکہ کے ملک میکسیکو (Mexico) میں منعقد ہوا جس کے فیصلہ کن مقابلوں میں سولہ ملکوں کی ٹیموں نے 32 مقابلوں میں حصہ لیا۔ یہ وڑلڈ کپ دنیائے فٹبال کے لیے ایک سنگےمیل ثابت ہوا۔ اس وڑلڈکپ کو پہلی دفعہ ٹیلی ویژن کی رنگین پردہ سکرین پر دنیا بھر میں لاکھوں شائقین نے دیکھا اورسونے پہ سہاگہ برازیل کے عظیم ترین فٹبال کھلاڑیوں نےا پنے جارحانہ، بہترین حکمت عملی اور انتہائی خوبصورت فٹبال ہنرمندی کے ذریعےپہلی دفعہ رنگین پردہ سکرین پر فٹبال دیکھنے کو چارچاند لگا دیے۔ اوراپنے کھیل سے فٹبال کو خوبصورت کھیل کا خطاب دلایا۔ شہرہ آفاق عظیم فٹبال کھلاڑی ایڈیسن آرنٹیس ڈو نسثی منٹو (Edison Arantes do Nascimento) المعروف پیلے کو ١٩٦٦ انگلستان وڑلڈکپ میں انتہائی منفی حمکت عملی کے ذریعے نشانہ بنایا گیا جس کے خلاف پیلے نے آئندہ ان کھیلوں میں نہ کھیلنے کی دھمکی بھی دی لیکن بعد میں وہ اپنی ٹیم کےساتھ فٹبال میدان میں آخری دفعہ اترے۔

برازیل کے پانچ حملہ آور جئیرزین ہو (Jairzinho)، پیلے(Pele)، جیرسن(Gerson)، اور ٹوسٹاؤ(Tostao) اور ریوی لینو(Rivelino) ایک ایسے مکے کی شکل اختیارکرلی جس کےسامنےدنیا کی کوئی بھی دفاعی لائن ریت کی دیوار ثابت ہوئی۔ برازیل نے فائنل میں اٹلی کو ایک کے مقابلے میں چار گول سے شکست دے کر تیسری دفعہ وڑلڈکپ کا اعزاز اپنے نام کرایا جس کے ساتھ ہی جولیس ریمٹ کپ (Jules Rimet Cup) ہمیشہ ہمیشہ کے لیے اپنے ساتھ برازیل لے گئے۔

فیفاوڑلڈکپ جرمنی (FIFA World Cup Germany 1974) ١٩٧٤میں یورپ ملک جرمنی (Germany) میں منعقد ہوا جس کے فیصلہ کن مقابلوں میں سولہ ملکوں کی ٹیموں نے 38 مقابلوں میں حصہ لیا۔ اس وڑلڈکپ میں مغربی جرمنی کے فرانزبیکن بیور (Franz Beckenbauer) اور ہالینڈ کے جوہن کرویئف (Johan Cruyff) نے اپنی اپنی ٹیموں کے لیے انتہائی بہترین کھیل پیش کیا۔ ١٩٥٤ میں جرمنی نے حیرت انگیز طور پر ہنگری جو ایک بہترین اوروڑلڈکپ کی ایک مضبوط امیدوارٹیم تھی کو ہراکر وڑلڈ کپ جیتا تھا، بالکل ویسے ہالینڈ (میری پسندیدہ ٹیم) جو مکمل فٹبال (Total Football) کی حمکت عملی پر یقین رکھتی تھی اور جس نے انتہائی خوبصررتی اور بہترین ہنرمندی کے ساتھ اس حمکت عملی کے ذریعے کامیابیاں حاصل کرکے فائنل میں پونہچی لیکن بدقسمتی سے ایک بار پھر آخری رکاوٹ پار کرنے میں ناکام ہوگئ اورایک بار پھر مغربی جرمنی نے مضبوط امیدوار ہالینڈ کو شکست دے کر دوسری دفعہ وڑلڈکپ کا اعزاز اپنے نام کرایا۔

اس فیفا وڑلڈکپ تحریری سلسلے کا تیسرا حصہ یہاں سے پڑھ سکتے ہیں۔
اس فیفا وڑلڈکپ تحریری سلسلے کا پہلا حصہ یہاں سے پڑھ سکتے ہیں۔

(جاری ہے)

فیفا فٹبال وڑلڈکپ ۱۹۳۰ تا ۱۹۵۴ - FIFA World Cup 1930 to 1954

2010-06-01T17:40:00.002+08:00

فیفا،(FIFA) فیڈریشن آف انٹرنیشنل فٹبال اسوسیئیشن (Federation of International Football Associations) کامخفف ہے، اس کی چھ ذیلی تنظیمیں ہیں افریقہ، ایشیاء، یورپ، شمالی وسطی امریکہ اور جزائرغرب الہند، اوشیانہ، جنوبی امریکہ. اس کا ہیڈکواٹر سوئزرلینڈ(Switzerland) میں واقعہ ہے۔ فیفا فٹبال(Football) کھیل کاایک کامیاب ترین ادارہ ہے جس کے زیرنگرانی پوری دنیا میں فٹبال کھیلی جاتی ہے۔ فیفا فٹبال وڑلڈ کپ فائنلز(FIFA Football World Cup Finals) اولمپک (Olympic)کے بعدقرہ عرض پرکھیلوں کا سب سے بڑا میلہ سمجھا جاتاہے۔ اس میلے میں دنیا کی بتّیس ممالک سے ٹیمیں حصہ لیتی ہیں۔ ان ٹیموں نے اپنے اپنے براعظموں (Continents) کی انتخابی مقابلے جیت کر فیفا وڑلڈکپ (FIFA World Cup) کے فیصلہ کن مقابلوں میں کھیلنے کا حق حاصل کیا ہے۔ اس بار فیفا وڑلڈکپ فائنلز براعظم افریقہ (African Continent) کے ملک جنوبی افریقہ(South Africa) میں منعقد ہورہا ہے۔ یہ ١٩٣٠ سے اب تک انیسواں فیفاوڑلڈ کپ ہے۔

پہلا فیفاوڑلڈکپ یوروگوائے ١٩٣٠ (FIFA World Cup Uruguway 1930)- میں ساؤتھ امریکہ(South America) کے ملک یوروگوائے میں منعقد ہوا جس کے فیصلہ کن مقابلوں میں تیرہ ملکوں کی ٹیموں نے اٹھارہ مقابلوں میں حصہ لیا۔ تمام مقابلے یوروگوائے کے دالحکومت مونٹیویڈیو میں منعقد ہوئے تھے۔ پہلے فیفا ورلڈ کپ کی فاتح میزبان یوروگوائے تھا جس نے فائنل میں ارجنٹینا(Argentina) کو چار کے مقابلے میں دو گول سے ہراکر پہلے فیفاوڑلڈکپ کا اعزار اپنے نام کرلیا۔

دوسرا فیفاوڑلڈکپ اٹلی ١٩٣٤ (FIFA World Cup Italy 1934)- میں یورپی ملک اطالیہ (اٹلی)(Italy) میں منعقد ہواجس کے فیصلہ کن مقابلوں میں سولہ ملکوں کی ٹیموں نے سترہ مقابلوں میں حصہ لیا۔ اس بار مقابلے اٹلی کے آٹھ شہروں میں منعقد ہوئے اور برائےراست ریڈیو تبصرے مقابلوں میں حصہ لینے والے بارہ ملکوں میں نشرکیے گئے۔ اس فیفا وڑلڈکپ میں پہلے ورلڈ کپ کی فاتح یوروگوائے ٹیم نےحصہ لینے سےانکارکرلیاتھا کیونکہ اطالیہ ٹیم نے بھی پہلے وڑلڈکپ یوروگوائے میں حصہ نہیں لیا تھا۔ اٹلی نے فائنل میں چیکوسلواکیہ (Czechoslovakia) کو دو کے مقابلے میں ایک گول سے ہراکر دوسرے فیفاوڑلڈکپ کا اعزار اپنے نام کرلیا۔ اس وڑلڈکپ کی خاص بات یہ بھی تھی کہ اس بار برازیل (Brazil) اور ارجنٹینا کمزور ٹیموں کے ساتھ میدان میں اتریں تھیں۔

تیسرا فیفاوڑلڈکپ فرانس ١٩٣٨ (FIFA World Cup France 1938)- میں یورپی ملک فرانس میں منعقد ہوا جس میں جنگ کے بادل منڈلانے کے باوجود فیصلہ کن مقابلوں میں پندرہ ملکوں کی ٹیموں نے اٹھارہ مقابلوں میں حصہ لیا۔ تیسرا فیفا وڑلڈکپ جنگ عظیم دوم (Second World War) سے پہلے کھیلوں کا آخری بڑا مقابلہ ثابت ہوا۔ خانہ جنگی اور اختلافات کی وجہ سے سپین(Spain)، یوروگوائے اور ارجنٹینائن نے ان مقابلوں میں حصہ نہیں لیا۔ اس فیفا وڑلڈکپ میں برازیل نے شاہکار فٹبال فن کا مظاہرہ کیا، لیکن اٹلی نے بھی مستقل مزاجی کے ساتھ بہترین فٹبال کھیلی، اور فائنل میں ہنگری(Hungary) کو چار کے مقابلے میں دوگول سے ہراکر اپنے اعزاز کا دفاع کامیابی کے ساتھ کرکےتیسرے فیفاوڑلڈکپ کا اعزار بھی اپنے نام کرلیا۔

چھوتھا فیفاوڑلڈکپ برازیل ١٩٥٠ (FIFA World Cup Brazil 1950)- جنگ عظیم دوم(جنگ کے دوران وڑلڈکپ ٹرافی جوتوں کے ڈبے میں فیفا کے اطالوی نائب صدر نے اپنے چارپائی کے نیچے چھپائی رکھی) کے بعد پہلا فیفا وڑلڈکپ برازیل میں منعقد ہواجس کے فیصلہ کن مقابلوں میں تیرہ ملکوں کی ٹیموں نے بائیس مقابلوں میں حصہ لیا۔ برازیل نے ان مقابلوں کے لیے اس وقت کا دنیا کا سب بڑا سٹیڈیم تعمیر کیا جس میں فیفا وڑلڈکپ ١٩٥٠ کا فائنل کھیلا گیااور جس کو بیک وقت دو لاکھ کے قریب شائقین نے دیکھا۔ لیکن اس وقت دولاکھ انسانوں سےٹھاٹھے مارتے سمندر میں سنّاٹا چھاگیا جب یوروگوائے نے فیصلہ کن مقابلے میں دو کے مقابلے میں ایک گول سے برازیل کو شکست دے دی اور دوسری دفعہ فیفاوڑلڈکپ کا اعزار اپنے نام کرلیا۔

پانچواں فیفاوڑلڈکپ سوئزرلینڈ ١٩٥٤ (FIFA World Cup Switzerland 1954)- میں یورپی ملک سوئزرلینڈ (Switzerland) میں منعقد ہوا جس میں فیصلہ کن مقابلوں میں سولہ ملکوں کی ٹیموں نے چھبیس مقابلوں میں حصہ لیا۔ جس طرح چارسال پہلے چھوتھے فیفا وڑلڈکپ میں یوروگوائے نے برازیل کو ہرا کر دنیائے فٹبال کو حیران کردیا تھا اس دفعہ یہی عمل مغربی جرمنی نے اولمپک فاتح اور اس وقت کی دنیائے فٹبال کی بہترین اور مضبوط ٹیم ہنگری کو شکست دے کر کیا۔ ہنگری فٹبال ٹیم اُس وقت کی غیر اعلانیہ چمپیئن ٹیم تھی جس نے پہلےراؤنڈ کے مقابلوں میں مغربی جرمنی(West Germany) کو تین کے مقابلے میں آٹھ گول سے شکست دی تھی۔ فائنل مقابلے میں بھی ہنگری نے پہلے دس منٹ میں ہی دو گول کی برتری حاصل کرلی لیکن پہلے بیس منٹ کے اندر ہی مغربی جرمنی نے دو گول کرکے مقابلہ برابر کردیا اور پھر وہ ہوا جس کی کسی کو توقع نہیں تھی، کھیل کے اختام سے پانچ منٹ قبل مغربی جرمنی نے گول کرکے ہنگریوں کو دانتوں تلے انگلی چبانے پر مجبور کرکے پہلے وڑلڈ کپ کا اعزاز پاکر دنیائے فٹبال میں اپنی آمد کا اعلان کردیا۔

اس فیفا وڑلڈکپ تحریری سلسلے کا دوسرا حصہ یہاں سے پڑھ سکتے ہیں۔

(جاری ہے)